Plantun de Prouvènço

Pèr coumpara dos planto d'encò nostre

Delphinium pubescens & Lythrum salicaria

Delphinium pubescens

Ranunculaceae

Noms en français : Dauphinelle pubescente, Pied-d'alouette pubescent.

Descripcioun :
Aquéu capouchin es uno planto basso de l'an, forço ramificado, pas trop coumuno, que trachis dins li meissoun e lis armas. Li fueio soun proun penado e sarrado, alor que li flour soun en grapo, proun sarrado peréu. Li flour soun à douminanto blanco emé de bluio o tambèn, emé de vióulet.

Usanço :
Couneissèn pas d'usanço particuliero pèr aquelo planto, pamens pensan que dèu èstre empouisounanto coume si cousino.

Port : Erbo
Taio : 10 à 30 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Delphinium
Famiho : Ranunculaceae

Ordre : Ranunculales

Coulour de la flour : Blanco
Petalo : irreguliero
Ø (o loungour) flour : 2 à 3 cm
Flourido : Printèms - Estiéu

Sòu : Ca
Autour basso e auto : 0 à 600 m
Aparado : Noun
Remarco : Champ de cerealo
Jun à juliet

Liò : Champ - Ermas - Meissoun
Estànci : Mesoumediterran à Subremediterran
Couroulougi : Estenoumediterrano-Ouèst
Ref. sc. : Delphinium pubescens DC., 1815 (= Consolida pubescens (DC.) Soó, 1922 )

Tè-di-paure

Lythrum salicaria

Lythraceae

Àutri noum : Crèsto-de-gau, Erbo-de-cierge, Erbo-de-ciro, Erbo-de-la-pòu.

Noms en français : Salicaire, Herbe aux coliques.

Descripcioun :
Grando planto de roubino, de canau e de ribiero bèn drecho, e di flour vióuleto que fan uno longo espigo. La planto s'atrobo d'en pertout e tiro l'iue de jun à setèmbre. Se pòu pas engana.

Usanço :
Lou tè-di-paure èi di proun vertuous : li flour sougnon la fouiro, lou mau de vèntre e d'estouma, e soun bono pèr la circulacioun dóu sang. Se bèu en infusioun (50 g de flour sèco pèr un litre d'aigo) o peréu en sirop (faire macera li flour emé de mèu). Parèis meme que soun bono contro la raumido de pèu (egzema). Dins lou TdF es escri que li gènt de Cadarousso n'en prenien après qu'aguèsson agu uno grosso pòu.